Махачкъалада, Дагъустандин ктабрин издательствода урус чIалал “Гасан Алкадари” тIвар алаз ктаб чапдай акъатнава. Адан автор Россиядин писателрин Союздин член, Алкьвадар Гьасан эфендидин музейдин директор Гьуьсейн Имамович Гьуьсейнов я.
Ктаб автордин сифте гафунилай башламиш жезва. Ам “Биография”, “Асари-Дагъустандикай” кхьинар”, “Дагъустандин алимрикай”, “Алатай вахтар, къенин йикъар, гележег”, “Дагъустан ва Россия”, “Алкьвадариди туьрк чIалалди кхьей шиирар”, “Гьасан эфендидин къанни са тарс”, “Гьасан Алкьвадаридин художественный весидай”, “Алкьвадар Гьасан эфендидин музейдин тарих”, “Алкьвадаридин ялавлу гафар, кагъазар, корреспонденцияр” ва маса кьилерикай ибарат я.
Ктабда Гьасан эфендидихъ, адан яратмишунрихъ, пак чкайрихъ галаз алакъалу гзаф кьадар шикилар, арифдардин вичин ва адаз бахшна кхьенвай шиирар, музейдин ктабда аниз атай машгьур ксари авунвай кхьинар гьатнава.
Лугьуз жеда хьи, Гь.Гьуьсейнова Алкьвадар Гьасан эфендидин документальный шикил яратмишнава.
“Гасан Алкадари” ктабдин рецензент профессор Амри Шихсаидов я. 392 чиникай ибарат тир ктаб 500 экземплярдин тираж аваз акъуднава.
Хазран Кьасумов
© Источник: Лезги газет